Kirkjudagur aldraðra í Ólafsvíkurkirkju

Sameiginleg messa safnaðanna í Snæfellsbæ verður í Ólafsvíkurkirkju kl. 14 á uppstigningardag, 30. maí.
Kirkjudagur aldraða.

Sóknarprestarnir þjóna fyrir altari og ræðumaður verður séra Arnaldur Máni Finnsson. Altarisganga.

Eldri borgarar eru sérstaklega boðnir velkomnir.
Rúta fer frá N1 á Hellissandi kl. 13:40 fer um Rif og kemur við á Jaðri.

Vinafélag eldri borgara býður upp á kaffiveitingar í safnaðarheimilinu eftir guðsþjónustu.  Félögin sem sjá um kaffið á vegum þess eru Slysavarnadeildin Sumargjöf, Kvenfélag Ólafsvíkur og Rauði kross Íslands, Snæfellsbæjardeild.

 

Æfing fyrir kórfélaga í kirkjukórum Snæfellsbæjar verður í Ólafsvíkurkirkju kl. 13  sama dag.

Uppstigningardagur

Litur: Hvítur.

Textaröð: B

Lexía: Slm 110.1-4
Davíðssálmur.
Svo segir Drottinn við herra minn:
„Set þig mér til hægri handar,
þá mun ég leggja óvini þína
sem skör fóta þinna.“
Drottinn réttir út þinn volduga sprota frá Síon.
Drottna þú meðal óvina þinna.
Þjóð þín kemur fúslega er þú kveður til her þinn.
Á helgum fjöllum fæddi ég þig
eins og dögg úr skauti morgunroðans.
Drottinn hefur svarið
og hann iðrar þess eigi:
„Þú ert prestur að eilífu
að hætti Melkísedeks.“

Pistill: Ef 1.17-23
Ég bið Guð Drottins vors Jesú Krists, föður dýrðarinnar, að gefa ykkur anda speki og opinberunar svo að þið fáið þekkt hann. Ég bið hann að upplýsa sjón hjartans svo að þið sjáið hver sú von er sem hann hefur kallað okkur til, hve ríkulega og dýrlega arfleifð hann ætlar okkur meðal hinna heilögu og hve kröftuglega hann verkar í okkur sem trúum. En þetta er sami áhrifamikli, kröftugi mátturinn sem hann lét koma fram í Kristi er hann vakti hann frá dauðum og lét hann setjast sér til hægri handar á himnum, ofar hverri tign og valdi og mætti, ofar öllum herradómi og sérhverju nafni sem nefnt er, ekki aðeins í þessari veröld heldur og í hinni komandi. Allt hefur hann lagt undir fætur honum og gefið hann kirkjunni sem höfuðið yfir öllu. En kirkjan er líkami hans og fyllist af honum sem sjálfur fyllir allt í öllu.

Guðspjall: Lúk 24.44-53
Og hann sagði við þau: „Meðan ég var enn meðal ykkar sagði ég ykkur: Allt sem ritað er um mig í lögmáli Móse, spámönnunum og sálmunum á að rætast.“
Síðan lauk hann upp huga þeirra að þau skildu ritningarnar. Og hann sagði við þau: „Svo er skrifað að Kristur eigi að líða og rísa upp frá dauðum á þriðja degi og að prédika skuli í nafni hans öllum þjóðum að taka sinnaskiptum og þiggja fyrirgefningu synda og hefja það í Jerúsalem. Þið eruð vottar þessa. Ég sendi ykkur andann sem faðir minn hét ykkur en verið kyrr í borginni uns þið íklæðist krafti frá hæðum.“
Síðan fór hann með þau út í nánd við Betaníu, hóf upp hendur sínar og blessaði þau. En það varð, meðan hann var að blessa þau, að hann skildist frá þeim og var upp numinn til himins. En þau féllu fram og tilbáðu hann og sneru aftur til Jerúsalem með miklum fögnuði. Og þau voru stöðugt í helgidóminum og lofuðu Guð.

Sálmar: 504, 30, 167; Heyr mína bæn, 47, 241, 526.

Dagsetning: 
Fimmtudagur, 30 maí, 2019 - 14:00