Annar í jólum í Ingjaldshólskirkju

Hátíðarguðsþjónusta verður í Ingjaldshólskirkju annan í jólum 26. desember kl. 14.

Breytingar vegna sóttvarnareglna:

Kirkjurnar verða hólfaðar og ekki krafist hraðprófs. Gæta verður að að halda 1 meters fjarlægð á milli ótengdra aðila. Það er grímuskylda.

Sérhólf með allt að 50 manns verður hægra megin í kirkjunni með sérmerktu salerni og annað hólf vinstra megin í kirkjunni, einnig með sérmerktu salerni. Kór og starfsmenn kirkjunnar verða í sérhólfi einnig. Annað hólfið yfirgefur kirkjuna áður en hitt hólfið yfirgefur hana. Börn fædd árið 2016 og síðar eru undanþegin fjöldatakmörkunum, nálægðartakmörkunum og grímunotkun.
Sóttvarnarreglur voru ekki hertar 22. desember hvað varðar athafnir í kirkjum.


Það þarf þó að skrá sig í athafnir sem eru hólfaðar. Upplýsingarnar eru geymdar tryggt og eytt eftir 2 vikur og eru samkvæmt sóttvarnareglum.
Allar frekari upplýsingar verða á heimasíðunni ef þarf að uppfæra sóttvarnir vegna nýrra reglna.
Hér fyrir neðan er skráningarform fyrir athafnir. Þar á að skrá alla þá sem eru í sama hóp samkvæmt sóttvarnarreglum og koma til athafnar. Þeir sitja saman í athöfn. Ef hóparnir eru fleiri þá eru útbúin fleiri blöð og send. Sendandi skráir netfang sitt og verður sent á það netfang hvar hópurinn situr í kirkjunni.
Skráningin á að senda með tölvupóst til prestur@kirkjanokkar.is með nafni, kennitölu og símanúmeri þeirra sem koma, skrá á hverjir ætla að sitja saman og eins merkja sérstaklega ef börn eru yngri en 6 ára.
Hægt verður að koma með útfyllt skráningarblað til kirkju, en ekki er þá öruggt að pláss sé laust. Eins eru blöð til skráningar í kirkjunni.

Annar í jólum – 26. desember

Litur: hvítur.

Textaröð: A

Lexía: Jes 9.1-6
Sú þjóð, sem í myrkri gengur,
sér mikið ljós.
Yfir þá sem búa í landi náttmyrkranna
skín ljós.
Þú eykur stórum fögnuðinn,
gerir gleðina mikla.
Menn gleðjast fyrir augliti þínu
eins og þegar uppskeru er fagnað,
eins og menn fagna þegar herfangi er skipt.
Því að ok þeirra,
klafann á herðum þeirra,
barefli þess sem kúgar þá
hefur þú brotið í sundur eins og á degi Midíans.
Öll harkmikil hermannastígvél
og allar blóðstokknar skikkjur
skulu brenndar
og verða eldsmatur.
Því að barn er oss fætt,
sonur er oss gefinn.
Á hans herðum skal höfðingjadómurinn hvíla,
hann skal nefndur:
Undraráðgjafi, Guðhetja,
Eilífðarfaðir, Friðarhöfðingi.
Mikill skal höfðingjadómurinn verða
og friðurinn engan enda taka
á hásæti Davíðs
og í ríki hans.
Hann mun reisa það og efla með réttvísi og réttlæti,
héðan í frá og að eilífu.
Vandlæting Drottins allsherjar
mun þessu til vegar koma.

Pistill: Tít 2.11-14
Því að náð Guðs hefur opinberast til sáluhjálpar öllum mönnum. Hún kennir okkur að afneita óguðleik og veraldlegum girndum og lifa hóglátlega, réttvíslega og guðrækilega í heimi þessum, í eftirvæntingu okkar sælu vonar, að hinn mikli Guð og frelsari vor Jesús Kristur opinberist í dýrð sinni. Hann gaf sjálfan sig fyrir okkur til þess að hann leysti okkur frá öllu ranglæti og hreinsaði sjálfum sér til handa eignarlýð, kostgæfinn til góðra verka.

Guðspjall: Matt 1.18-25
Fæðing Jesú Krists varð á þennan hátt: María, móðir hans, var föstnuð Jósef. En áður en þau komu saman reyndist hún þunguð af heilögum anda. Jósef, festarmaður hennar, sem var valmenni, vildi ekki gera henni opinbera minnkun og hugðist skilja við hana í kyrrþey. Hann hafði ráðið þetta með sér en þá vitraðist honum engill Drottins í draumi og sagði: „Jósef, sonur Davíðs, óttast þú ekki að taka til þín Maríu, heitkonu þína. Barnið, sem hún gengur með, er af heilögum anda. Hún mun son ala og hann skaltu láta heita Jesú því að hann mun frelsa lýð sinn frá syndum hans.“
Allt varð þetta til þess að rætast skyldi það sem Drottinn lét spámanninn boða: „Sjá, yngismær mun þunguð verða og fæða son og lætur hann heita Immanúel,“ það þýðir: Guð með oss.
Þegar Jósef vaknaði gerði hann eins og engill Drottins hafði boðið honum og tók konu sína til sín. Hann kenndi hennar ekki fyrr en hún hafði alið son. Og hann gaf honum nafnið JESÚS.

Sálmar: 74, 73 (1.-3. og 7.-9.), 80; 811, 82.

Gestir:772 Gestir í dag: 5 Gestir í allt: 1814764